قازاقستان ۇلتتىق قۇراماسىنىڭ باس باپكەرى ستانيمير ستويلوۆ الداعى جولداستىق كەزدەسۋلەر الدىندا ءوزىنىڭ العاشقى ءباسپاسوز ءماسليحاتىن وتكىزدى. ەستەرىڭىزگە سالا كەتەيىك, ۇلتتىق قۇراما 23 جانە 26 ناۋرىز كۇندەرى ۆەنگريا جانە بولگاريا قۇرامالارىنا قارسى وينايدى. ستانيمير ستويلوۆ جۋرناليستەردىڭ ماڭىزدى دەگەن بىرقاتار سۇراقتارىنا جاۋاپ بەردى.
– ۇلكەن جولدىڭ باستاۋىندا تۇرمىز. بۇل جول ءبىز ءۇشىن اۋىر جانە ۇزاق. جولداستىق كەزدەسۋ بولسا دا الداعى ويىنداردىڭ جاۋاپكەرشىلىگى جوعارى. قوس كوماندا دا بىزدەن مىقتى. جاقسى تاجىريبە بولادى. ۇلتتىق قۇرامانى جاڭا دەڭگەيگە كوتەرۋىمىز كەرەك. ەل بىرىنشىلىگىنىڭ بىرنەشە ويىنىن كوردىم. اشىعىن ايتسام, فۋتبولشىلاردىڭ دەڭگەيىنە كوڭىلىم تولمايدى. وتە تومەن. جولداستىق كەزدەسۋلەرگە نەگىزگى 3 ويىنشىمىز جاراقاتىنا بايلانىستى قاتىسا المايدى. لوگۆينەنكو, جۋكوۆ, لۋنين. ۇلتتار ليگاسى اياسىنداعى ويىندارعا بار كۇشىمىزدى سالۋىمىز قاجەت. ءبىز فاۆوريت ەمەسپىز. تەك توپتان شىعۋعا ۇمتىلامىز. فاۆوريتتەر بارلىق ۋاقىتتا جەڭىسكە جەتە بەرمەيدى. سوندىقتان بار كۇش-جىگەرىمىزدى سالامىز. تالاپ قويا ءبىلۋىمىز كەرەك. ءتارتىپ پەن تالاپ بولسا, ناتيجە كەلەدى. كاسىبي دەڭگەيىمىزدى ارتتىرۋ ماقساتىندا ايانباۋىمىز كەرەك. مەنەن كۇنى ەرتەڭ ناتيجە كۇتپەڭدەر, ول ءوزى ۋاقىتىمەن كەلەدى.
– موكيننىڭ جاسى 37-گە كەلدى. ونىڭ قۇراماعا شاقىرتىلۋى قانشالىقتى ورىندى؟
– جاسىنا قارامايمىن. موكين مىقتى, تاجىربيەلى قاقپاشى. ماعان تالابىمدى ورىنداي الاتىن قاقپاشىلار كەرەك.
– نەگە جولداستىق كەزدەسۋلەرگە بولگاريا مەن ۆەنگريا تاڭدالدى؟
– ۇتىلۋىمىز دا مۇمكىن. ەڭ باستىسى, دۇرىس قورىتىندى شىعارىپ, العا قادام باسۋىمىز ماڭىزدى. بىزدە جولداستىق كەزدەسۋلەر ۇيىمداستىرۋدا كەمشىلىكتەر بار. باسقا كوماندالارمەن ويناۋعا دا بولۋشى ەدى. مىقتى كوماندالارمەن ويناۋ ارقىلى شەبەرلىگىمىزدى شىڭداي تۇسەمىز.
– وسىعان دەيىن ۇلتتىق قۇرامادا وزگەرىستەر بولۋى مۇمكىن دەگەن بولاتىنسىز...
– وزگەرىس بولمايدى. تىزىمدە بار ويىنشىلارعا سەنىم ارتامىز. جاس ويىنشىلار بار. سەيداحمەت, زاينۋتدينوۆ سياقتى جاستارعا مۇمكىندىك بەرىلەدى.
– كاپيتان كىم بولادى؟
– داۋىسقا سالىنبايدى. كاپيتان كىم بولاتىنىنا بايلانىستى شەشىمدى ءوزىم قابىلدايمىن. ەكى ويىندا ءارتۇرلى كاپيتاندار بولۋى دا ىقتيمال.
– باۋىرجان يسلامحان قۇرامانىڭ كوشباسشىسى بولا الا ما؟
– ول وتە مىقتى ويىنشى. قورعاۋشىلىق جاعىنا كوپ ءمان بەرۋ كەرەك. باۋىرجانعا سول عانا جەتىسپەيدى. ساپالى ويىنشى بولا الادى. ءبىز كومەكتەسەمىز.
– نەگىزگى شابۋىلشىلار كىمدەر؟
– ششەتكين, حيجنيچەنكو, مۇرتازاەۆ. شابۋىلشىلار ەمەس, ورتالىق قورعاۋشى پوزيتسياسى پروبلەما بولىپ تۇر. لوگۆينەنكو ويىنعا قاتىسا المايدى. ول نەگىزگى ورتالىق قورعاۋشىمىز بولاتىن.
«ۇلتتىق قۇرامانى جانكۇيەرلەردىڭ, جۋرناليستەردىڭ قولداۋى ماڭىزدى. ءبىز بارلىعىمىز جۇمىس جاساۋىمىز كەرەك. سوندا عانا ناتيجە بولادى. ۇزاق جول كۇتىپ تۇرعانىن ايتتىم. سول جولدان ابىرويمەن وتۋگە بارلىعىمىز جۇمىس جاسايىق. ۇلتتار ليگاسىندا توپتان ءبىرىنشى بولىپ شىعۋعا تىرىسامىز. ءبىزدىڭ قارسىلاستارىمىز دا مىقتى. دەگەنمەن, ءوز ويىنشىلارىمنان ەۋروپالىق ويىن كۇتەمىن. «استانا», «قايرات» كومانداسىنان شاقىرتىلعان, تاجىربيەلى ويىنشىلار ەۋروپالىق فۋتبولدى كوردى. كۇزدە تولىق دايىن بولۋىمىز كەرەك», – دەپ قورىتىندىلادى ستانيمير ستويلوۆ ءباسپاسوز جيىنىن.
ەركەبۇلان جومارت,
«ەگەمەن قازاقستان»